Aaj mujhe pata chala - matbal online bhaashaa me jaise bolte hain TIL - Today I Learnt, ki aaj World Octopus Day hai.
https://youtu.be/zROngCqX-DU
Kis octopus ne ye muhim uthai thi ki 8 October ko hume humans ki taraf se celebrations chahiye? Obvisouyl kisi insaan ne hi ye maan sammaan dene ki sochi hogi is tentacled samudri jaanwar ko. Chaliye chhodiye, mera kya lenaa denaa, main to World Space Week aur National Space Day se khush rehta hu, aur apna janamdin 15 Auigust ko poore bhaarat ke saath manata hu. Lekin gaurtalab baat ye hai, ki jab tak controversy naa karo, tab tak koi aukaat hi nahi hai aapki online duniya me. Aajkal ke log jab tak offend nahi hote ya gaaliyan nahi sunte, tab tak unke kaano pe joon nahi rengti, aur fir aisi rengti hai ki kahi aur hi pahunch jaati hai, matbal dimaag me, aur kahan jaayegi joon kaan se bhai? Hadd karte ho aap log yaar. Rehne do, aapko pata hai ki mujhe pataa hai ki aapko pataa hai main kya bol rahaa hu. Or as they say, you know i know you know, or if you know you know, or if you don't know how and why are you even alive. Bade melodramatic hai aajkal ke young log. Actually young log humeshaa dramebaaz hote the, main boodha ho gaya hu. Koi baat nahi, jab tak hai jaan, hum rahenge jawaan! Author to hum hain hi, YouTuber banne ke liye kyu kisi aur ko zaleel karna hai ya kisi ki khilli udaani hai? Kyuki jantaa ko yehi chahiye bhai! Hum nahi karenge. Hum acchi cheezen sochenge aur unke baare me bolenge, jaise ki antrix science ko badhaava denaa, Bihar ki badhiya historical viraasat, badhiya kitaabein, TV shows, movies, jo imagination trigger karein bachhon kaa, football, cricket, aur bhi kayi sports jaise sepak takraw, kabaddi, jiske baare me baat karein to dukh hota hai kyuki Patna Pirates table ke ekdum bottom me hai abhi filhaal, aur aasaar nahi dikh rahe unke oopar uthne ke. Sports fan honaa bhi badi bhasudi hai, kisi aur insaan ke performance ke kaaran apna mood prabhaavit hone denaa ajeeb baat hai, lekin kya karein, control nahi hota. Koi na koi world sports day bhi hota hoga, us din main Axat apni saari favorite sports teams ko man bhar ke kosunga aur chain ki neend sounga, bina result ki fikr kiye. Tab tak, alvidaa, namaste!
Comments